باصرخ وأقول الآه(26)
والإبن بعدالطرد
في القلب كان مأواه
والأقصى ويا المهد
عايشين معاه وجواه
باصرخ وأقول الآه
ونبض قلبي لما خدني
قاللي بطنك قبل بطني
قاللي ابنك هو ابني
وأنت بالأحجار رميتني
جرحت قلبي بطعنتك
بعدأما رق وحنلك
وإيديا مسحت دمعتك
يافتح يافلسطين
أو حتى حماسيين
أرض الكنانة درع
أرض الكنانة ردع
أرض الكنانة عرض
وأولادها مصريين
لكن الكرامة خط أحمر
ماهوش خطين
ماتشوفوامصر المجد
أم الهرم والسد
ده لكل واحد حد
ولا عمره كان اتنين
بقى هو يعني اليد
في الشدة لو تتمد
يكون جزاها العض؟
ولا أنتوا مش فاهمين
ده علمنا رمز المجد
عمره ما كان علمين
وجميلنا لو يترد
بالعنف يا فلسطين
ع القلب لما يرق
لازم نقول آسفين
والاعتذار للأرض
واجب كمان للطين
غريب الدار(27)
يا أرض المجد ضميني
ياريت الوحدة تحميني
جبال الصبر قتلاني
وأنا عايش لحرماني
بيشهد بالوفا طيني
فلسطيني فلسطيني
عروبة بمس شيطاني
تقول المجد عنواني
وبعد ثواني تنساني
فلسطيني فلسطيني
أخويا ياحتة من قلبي
في قلبي بيتغرز سيفك
غريب الدار إليك أجري
ويجي بكايا على كيفك
قولوا لي ياناس لمين أشكي
أصيل بالدم مهما أحكي
يقول الطين فلسطيني
وبارفع في السما عييني
وأقول يارب ترزقني
بيد أخويا تحميني
وبعد مماتي تحييني
فلسطيني فلسطيني
ليالي رمضان(28)
ملت ليالي الصبر
مالجهد والتفكير
والليلة شاف البدر
رمضان وطفل فقير
طفل وكأنه في أسر
وأعجب من الفوازير
عايش يا ناس حلمه
بفانوسه يبقى أمير
والذنب مش ذنبه
دا الأب أصله فقير
مالهوشي أكل اللحمة
ولا شوي ولا تحمير
ولا لقمة وسط اللمة
وفي بلدي خلق كتير
في اليوم بتاكل ياما
وأساتذة في التبذير
الله على الإسلام
في الشدة فضله كبير
وصانا خير ووئام
والرب في التدبير
دي ذكاتنا وصلاتنا
جنة وزادها الخير
مع بسمة نرسمها
على وجه طفل فقير
ممكن جبال الشر
تدوب في بحر الخير
لاجئ سياسي(29)
طالب لجوء سياسي
ولاعمري هطاطي راسي
للناس ولا المكان
زمان كان يا ما كان
الورد ع الجدران
يرقص سعيد فرحان
والقلة والفنجان
وقلوب للكون صديقة
شوارعنا تقول حديقة!!
واحة أمن وأمان
مافيش ولا حجر صحي
ولاسل ولادخان
دا الأسطى حكيم زمانه
فارس عصره وأوانه
سبب طرش الودان
وجارتنا الحلوة هامة
ياحلاوة المحشي لما
بإيديها يفيض حنان
الله على أم سيد
حكايتها كمان جنان
لوترمي مخلفاته
في الشارع للجيران
كأنها عامله حفلة
في عيد ميلاد فيران
وتنادي ع الحكومة
تنضف المكان
دبان وناموس وطافش
والكل ف بلدي هارش
من شدة الحصار
تبص نلاقي مطرب
بيغني للحمار
خيار أورز جايز
محلاه طعم الخضار
يا سلام لو يوم يغني
مرة لديل الحصان
ده تلوث سمعي
لازم تتظاهر له الودان
بينا نضف بلادنا
علشان سلام ولادنا
وحضارة الأوطان
يا ريتك يا مة ويايا(30)
يا وردة وساكنة جوايا
جبال الصبرفي حشايا
خريف للقلب يندهلك
أسير مشتاق عبيرحبك
ياريتك يا مة ويايا
جناح الصبر ناداني
بكاس المر وسقاني
يا ساكنة ف روحي وكياني
يا ريتك يا مة ويايا
يا أول كلمة في غنايا
رموش الهم وشقايا
بتحضن خوفي جوايا
يا ريتك يا مة ويايا
عيون القلب تندهلك
عبير الحب مشتاق لك
ونبض القلب بيقولك
يانجمة روحي يا أمي
في أحضان البعاد ضمي
سنابل شوكي على ألمي
وضاع العمر يا أمي
زمان ...
همك غسل همي
يا ست الكل يا أمي
ياريتك يا أمة ويايا
خيوط الصبر بتنادي
وتحلف جي في معادي
يا ست الكل يا أمي
مراري بيجري وف دمي
تعالي تضمي وتسمي
خريف العمر يا إسمي
بتبدر في الهوا رسمي
معالم تايهة جوايا
بتدفن كل ضحكايا
وتكتب بالوفا حكايا ياريتك يامة ويايا
مساء الفل يا غالية (31)
على خدود الأمل بصي
بكل الحب هاتحسي
دا رمش القلب بيمسي
جايب لك م السما هدية
قصايد حب وردية
مساء الفل يا غالية
وحضنك كل موانيا ؟؟؟
مساء الفل يا غالية
بتغزل شعري وحروفه
عيون القلب بتشوفه
تقول قوافيه
تضم القلب بكفوفه
وكل ما فيه
مساء الفل يا غالية
وحقك يا أمة على راسي
وقلبك هو نبراسي
مشاعري وكل إحساسي
يا جنة أهلي مع ناسي
مساء الفل يا غالية
يا وش الخير
في ليل الغربة بندهلك
وقلبي أسير
بيخلق صوته من صمتك
وزي الطير
أهيم أحضن تراب أرضك
بكيت من قلبي وآهو ضمك
بدون تفكير
مساء الفل يا غالية
يا وش الخير
في يوم أصحابي خدعوني
لأرض هلاكي وخدوني
قالولي إن أنت هتهوني
فالولي اللحظة في ابعادك تجيب دنانير
وتهت ف ليلي والغربة
من التفكير
واديني ف لحظة برجعلك
بطفل كبير بيخلق خيري جوايا
ياريت يا أمايا سامحيني
أنا ابنك أكيد ليكي ومش للغير
مساء الفل يا غالية يا وش الخير
خـــلاص(32)
يا ما كنت اتمنى تسأل
وأنت تتقل وتتقل
يا خسارة على الهوا
لو ضاع معنى الحياه
إزاي الحب يوصل
وأنا كنت أتمنى تسأل
وأنت تتقل وتتقل
يا ما كان قلبي معاك
دايب حب في هواك
وفي فرحك وأساك
كان دايما قلبي يسأل
لكن خلصت خلاص
لازم هاوضع أساس
والجرح في الإحساس
يقول للحب يرحل
كان حبك لي الهلاك
وأنا قلبي راح ينساك
منايا في يوم لقاك
ما أسألشي ولا أنت تسأل
ياما كنت أتمنى تسأل
وأنت تتقل وتتقل
قول يا حبيبي(33)
عن بعدي مين مسئول
ليه البعاد بيطول
وأفضل أنا مشغول
قول يا حبيبي قول
وارجع لي تاني عشاني
مشتاق إليك بحناني
لسه معاك عنواني
قول يا حبيبي قول
الشمس هي جبينك
والحب هو حنينك
كل النجوم شايفينك
مهما الليالي تطول
قول ياحبيبي قول
عاشقك ومش معقول
كل الأماني اتزول
هافضل أغني أوقول
قول يا حبيبي قول
ليه البعاد بيطول
فارس الترحال(34)
موال وكام مرسال
وخطانا ع الأهوال
بسألها ألف سؤال
عن فارس الترحال
إزاي بسمار جبينه
وبياض قلبه وحنينه
كل العيون شايفينه
إنسان غريب رحال
طيبة قلبه وأنينه
وقلوب كتير ظالمينه
تايهين ومش عارفينه
دا الغدر منه محال
موال وكام مرسال
عن فارس الترحال
عاشق أنا الموال
يا فارس الترحال
زيك أنا رحال
والروح تناجي الروح
كل اللي شافك قال
دا صمته أحلى كلام
يتحدى بيه الأيام
وقلبه خير وسلام
رغم إن أناته
صوتها يهز جبال
في كلامه وسكاته
عالم اكيد فنان
وألف آه وآه لو يوم يتوه مرساه
تلقاه في عز الآه
كل القلوب مرساه
والطيبة دي زاده كرم الإله علاه
آه يا ليلي(35)
آه يا ليلي وآه يا عين
ع الحب ما بين قلبين
لو يطرح شوق وحنين
آه يا ليلي آه يا قمر
حبك ده حكم قدر
يا حبيبي حبك أمر
في عيونك يحلا السهر
وآه يا ليلي آه يا عيني
يرويك حبي وحنيني
تسكن روحي وتكويني
آه يا ليلي آه يا قمر
أنا صحرا وانت المطر
أنا طير وانت الشجر
ماتقولي ليه أنا حيرانة
في عيون حبيبي وسهرانة
وسهران هنا الحب معانا
آه يا ليلي آه يا زماني
قلبك وطني وعنواني
ناسية زماني ومكاني
طيرة ف أحضانها شجر
آه يا ليلي آه يا قمر
حبك ده حكم قدر
عيون حبيبي(36)
يا عيون حبيبي أنا سامحيني
مش قصدي أظهر بأنيني
سامحي الهوى والشوق والروح
يلا احضنيني أنا ضميني
يا عيون حبيبي أنا سامحيني
محتاج حنانك دفيني
قلبي اللي ياما قاسى الحرمان
غير مبادئي وتكويني
وصبحت عاشقة بكل إيمان
دستوري شوقي وحنيني
يا عيون حبيبي أنا سامحيني
حبيبي روحي ونور عيني
واللمسه م الهنا تحييني
من نظرة بس بترويني
ياعيون حبيبي أنا سامحيني
مابين ضلوعه أنا قلبي هناك
يقوله روحي أنا رهن رضاك
حيرانه م الباب للشباك
لو دق قلبي أنا هاستناك
وافتح وأدوب لحظتها معاك
مين صدره غيرك يئويني
ياعيون حبيبي أنا سامحيني
سامحي الهوا والشوق والروح
يلا احضنيني وضميني
جزيرة الحب(37)
ريشة فنان رسمت إنسان
أحضانه أوطان وكلامه كمان
أبيات لقصايد لها أوزان
محلاه فنان حبيبي وإنسان
من حبي زرع ياسمين وريحان
الشوق وياه توهني وتاه
من قولة آه والقلب معاه
دوبني وداب في ليالي هواه
محلاه فنان حبيبي وإنسان
البحر بيشرب منه حنان
وسمايا كمان وقمر سهران
غيران حيران
لو انطق اسم حبيبي كمان
محلاه فنان حبيبي وإنسان
دي اللحظة في بعد حبيبي سنة
وأنا أقوله بحبك آه يا أنا
اغزل أنا اسم حبيبي هنا
محلاه فنان حبيبي وإنسان
بانسى وياه مين تبقى أنا
صوتك ألحان ونغم رنان
محلاك إنسان محلاها أوطان
جزيرة حب ف قلبي أنا
آه يانفسي بحبك آه يا أنا
لحظة عجز(38)
إزاي ياقلبي حبيبي
يصرخ يقول الآه
وأنت يا قلبي حبيبه
ساكن معاه وجواه
إزاي يقول الآه
وقلبي منه قريب
أجمل وأغلى حبيب
لحظة ما قال الآه
هربت دموع العين
أشكي لمين أو فين
واصرخ بأغلى الصوت
ليه الزمن بيفوت
ع الحب يصبح ذنب
تنزف دموع القلب
في زمن وله وشين
إزاي يقول الآه
والعين تناجي العين
كل القلوب حاضناه
وأنا قلبي فيه سكين
يا قلبي مليون آه
باصرخ وأقولها معاه
إزاي نعيش مساكين
مع إن نبض القلب مقسوم بين الحبيبين
قمر السهر(39)
قمر السهر سهران
محتار يا ناس حيران
يا صبر والله زمان
قمر السهر سهران
وأملنا جاي بكرة
مبسوط ياناس فرحان
يتزف بالبشرى
وأنا بالأمل أدرة
أرجع اللي كان
قمر السهر سهران
وطيوره تتوشوش
في القلب بتعشش
يا حبيبي ما هنتش
والله علي ثوان
قمر السهر سهران
في عشقي أنا ولهان
وحروفي تتمايل
قوافيها والأوزان
قمر السهر سهران
ونجومه زي زمان
تغزل حروف إسمك
أجمل حبيب إنسان
فارس بلا عنوان
للحب كان قبطان
فلبه بمليون سفينة
بحره محبه وحنان قمر السهر سهران
سهر الليالي(40)
حاولت كتير أخبي
عنك يا روحي حبي
وحاكمني بقسوة قلبي
حاولت كتير أخبي
حبي ونار اشتياقي
لو قلت أهرب ألاقي
حلمي بيوم التلاقي
يفضح بالحب قلبي
حاولت كتير أخبي
عشقي ف قلبي وحناني
يرجع يتقوى حبي
ويقوي بيك إيماني
حاولت كتير أخبي
بس ف قلبك مكاني
وف قلبي نجم عالي
يحضن قمر الليالي
ينده بالحب اسمك
طبع الحسن فملامحك
يا حبيبي تعالى جنبي
تسكن بالحب قلبي
ده كتير حاولت أخبي
عنك سهر الليالي
أعز الأحباب(41)
حبيبي يا أعز الأحباب
بسأل أنا والرد جواب
لو البعاد كان يوم ممكن
من القلوب هنا يتمكن
إزاي يكون بين الأحباب
بحر العيون لو كان سكر
إنت وأنا شهد مكرر
والقطفة منه بعد غياب
تزيد كتير عدد الأحباب
بسأل أنا والرد جواب
كل القلوب هنا تتمختر
مشتاقة هيمانة بتسهر
في جمال عيون
حبيبي الأسمر
والفجر سهران بيكبر
يا حبيبي سبحان مين صور
محلا اللقا من بعد غياب
خلا السعادة بتدور
ع الحب يا أعز الأحباب
وسألت أنا ببراءة سؤال
للقلب رد بسرعة وقال
من الجنان لو يوم إنسان
للبعد عنك يتصور
سماحة شدة حب إيمان
للجهل بيها يتنور
يا حبيبي يا أعز الأحباب
بسأل أنا والرد جواب
الخصخصة(42)
يا بلادنا وقسموكي
واتوصوا بيا أنا
يا بلادنا وخصخصوكي
للأخ وللضنا
يابلادنا وقسموكي
وبقولها من هنا
مش عاوز آخد صكوكي
هافضل فقير أنا
وبلادنا تضمنا
مش عاوز أركب شيروكي
هاركب حمار أنا
يا بلدنا وقسموكي
ناويين تاني يبعوكي
مش ناقص إلا أنا
يابلدنا وقسموكي
وكمان هايقسموني
أو يمكن هايبعوني
وعشان ماليش تمن
مين يشتري الحزين
تايه من غير وطن
يا بلادنا وقسموكي
واتوصوا بيا أنا
يا مثبت العقول
باصرخ أنا وبقول
أدمنت أكل الفول
مش عاوز كفته أنا
طعمية اتضمنا
وعلينا حنينة
يا مثبت العقول
خلصت كل الحلول
أمال راح فين تاريخنا
أو عهد مجدنا
يا بلادنا وقسموكي
واتوصوا بينا
أنا أنا آآآآآ
أنوار الحسين(43)
كلمة وطن يعني الإيمان
يعني الصلاة يعني الأمان
يعني الحياة والحب دين
ونور جبين سيدنا الحسين
فارد شراعه ع الوطن
غصن الزتون فرحان قوي
وأرضه للإيمان سكن.
بما إنه ده معنى الوطن
بسألكوا ليه ؟؟
بسألكوا ليه مات الحنان
وعلى الإيمان فات الأوان
مع إن صوت الحق بان
رغم إنه واضح من سنين
بيشق نوره للسراب
يسألكوا ليه تاني العذاب
يسألكوا وف قلبه الأنين
فين الإيمان والرحمة فين
ليه اتفجروا ف سيدنا الحسين
ليه تخسروا صوت النبي
بالرحمة قال
يلا ادخلوا جواها وأنتم آمنين
وف أي مله .. كتاب ودين
رب العباد قال الأمان يا مرسلين
أما اللي فاكر إنه لو غرق وطن
هايكون نبي
أو لو طلق في ضلوعه صوت
جاهل غبي
هيكون شعاع
بالجلابية البيضة فوق البنطلون
والدقن ما تعرف حدودها
من حدود اللي يخون
يبقى ناسي يعني إيه
يكرم ضيوفه
يعني لما يكون في أرضك
ينسى خوفه
يا اللي ما ليكم وطن
ولا أي دين
يا اللي ما ليكم سكن
وف أي ملة منبوذين
ليه تجمعوا خيوط السراب
وتضلوا واتجارم بالدين
بغداد(44)
بغداد يا بغداد
للعزة بينا معاد
رملك تراب أمجاد
بغداد يا بغداد
م الفرقة والله ما عاد
شمع الفرح ينقاد
بغداد يا بغداد
زرع العدا خوفي
والهم كان ضيفي
يغزل لي توب خوفي
لون السواد له حداد
بغداد يا بغداد
طفلك يموت م الخوف
م الفرقة انا مكسوف
والقلب بات ملهوف
ع الأهل والأحفاد
بغداد يا بغداد
يا رمش قلب الليل
دم ف عروقي أصيل
تكويه نيران الويل
ع العزة والله دليل
ولا عمري هابقى ذليل
هأنادي أخوة إبعاد
بغداد يا بغداد
يا دمعة ف عيوني
عمرك ماهتهوني
أهلك عرب أسياد
بغداد يا بغداد
صوت الوليد رنان
تايه بقاله زمان
يغزل خيوط بكرة
ويحضر البشرة
والزينة للأعياد
بغداد يا بغداد
من دمعه ضي النور
يغزل له قلب جسور
فارس نيرانه تثور
ولا مرة بات مقهور
ها يرجع الأمجاد
للعزة بينا معاد
بغداد يا بغداد
الجمعة أكتوبر 21, 2016 4:21 pm من طرف 
Ahlamontada 
