التليفزيون(16)
قنواتنا يا ناس رؤيتها أساس
محلاها فتواها قناة الناس
والأزهر خادللي أجازة خلاص
في التليفزيون التليفزيون
لو كنت تجارة أو ف الألسن
فرص الأعمال هنا مش ممكن
ديتها هتقرا وتتمكن
وتكون كده شيخ في التليفزيون
الشعب ده طيب قلبه حنون
أصبح مجنون بالتليفزيون
في التليفزيون التليفزيون
في التليفزيون بهارات يا بنات
ماكياج وآهي موضة للستات
من بعد فسيخ يعمل شربات
ولقهر الزوج ده سبع وصفات
في التليفزيون في التيفزيون
الحاجة دي فتواها عجيبة
ضرب الزوجات للزوج هيبة
فتواها مبنية على الخيبة
في التليفزيون التليفزيون
الشيخ بيقول الكورة حرام
والبسمة عقابها سبع تيام
كلنا في جهنم نبقى نيام
في التليفزيون في التليفزيون
الواد محروس والبت وفاء
عاشقين في الدنيا جمال هيفاء
للفن العربي كتبت رثاء
في التليفزيون التليفزيون
في التليفزيون السقة آهو مات
وكرومبوا حظيرته عشر جاموسات
بينا يلا شاهدها جاموسة ع السات
بينا يلا يا ناس ع الفضائيات
نشوف اللي هايجرى وبكرة يكون
في التيفزيون التليفزيون
محلاها قيمنا ومهما يكون ....
في الدنيا أرق وأحلى جنون
التليفزيون التليفزيون
نور الصباح(17)
الفجر نوره واكتمل
ماتنادي أحمد يا أمل
قولي له حي على الفلاح
قوم نغزل النور بالأمل
راح تسمعوا صوت القلل
غنى معاه عمي صلاح
للي اتقطع واللي اتوصل
ولمعته في عينه الأمل
بتخلي كل الكون براح
وتقول إيماني بالعمل
راح يشفي قلبي من العلل
مهما تكون في الكون رياح
نهزمها مع قتل الكسل ..
. ويتولد نور الصباح
ويتقتل كل الملل ......
مع ضي شمسه اللي اتوصل
بنور عيون عمي صلاح
والله يا قلبي على العمل
لو يوم يبوس خد الأمل ...
يتولد نور الصباح
كان جدو نونو(18)
الحلوة عيونه
تصحي القلب بكل شجونه
عاشق وطنه ماعمره يخونه
ماعمره يخونه
كان جدو نونو
ورغم أنينه يشكي لرب الكون ويعينه
يكبر زرعه ف أرض حنينه
كان جدو نونو
بطبعه حنون
طيبة قلبه تساع الكون
كان جدو نونو
آه يا حلاوته
نورعقلي بكل ثقافته
قال العقل ده يوم هينور
هاكبر ويا الفكر ويكبر
محلا كتابنا العلم ينور
كل الخير جواه ف مضمونه
كان جدو نونو
وأنا بردو نونو
هعشق وطني وعمري ما أخونه
وافدي ترابه وسماه وأصونه
كان جدو نونو
ماما سوزان(19)
رسالة من طفل بعيدا عن الضوء
يا ماما سوزان
أنا طفل صحيح !!
ولكني جعان
عارف إنك بتحبيني
وتقدري قيمة الإنسان
كل الناس في شتاها غطاها
وأنا بتلوى من الحرمان
نفسي ف مرة أبات شبعان
نفسي ف ورقة أرسم لك فيها
جرحي وجرح أخويا كمان
نفسي ف لقمة ما بيني وبينه
لجل ما مرة يبات فرحان
نفسي ف أكلة رز وفتة
سمكة بلطي أو مرجان
نفسي أحافظ على الأوطان
نفسي أبطل مدة إيدي
للزوار والغرب كمان
ماما سوزان
أنا فرحان كده جدا بيكي
بدلي فيا الخوف بأمان
مليون وردة أهديها إليكي
ياوردة نادية على الأغصان
آدي إيديا خديها في إيديكي
تخلق جندي شجاع في ميدان
لكن الشارع خلاني أبكي
طفل صحيح ولكني جعان
عمره ما حس في يوم بأمان
ماما سوزان يا ماما سوزان
بدلي فيا الخوف بأمان
صرخات الِعزة(20)
أنا بنت غزة يا غالية يامة
يا بنت غزة للعزم همه
أنا طفلة يا مة وبتنعي أمة
يا بنت غزة يا غالية يا مة
وأنا يا مة بارضع من شوق حنينك
رصاصة يامة طالت جبينك
رضعت دمك وصوت أنينك
ونداكي قلبي ضميني ضمة
يا بنت غزة يا غالية يا مه
وحشاني يامة بصوت صراخك
وحشاني يامة ضمة دراعك
رضعت دمك لحظة وداعك
يا بنت غزة يا غالية يامة
وأنا بنت غزة
أنا اسمي عزة
هاكبر يا أمي وأنا كلي عِزة
وف كل قلب أنا هابقى غزة
آخد بتارك وافديكي يامة
يا بنت غزة يا غالية يا مة
شعاع المصري(21)
قال الشعاع للشمس يلا
أنوار جبين المصري هلا
والمصري ده سلطان زمانه
والكل عارف ده فين مكانه
الله عليه والحارس الله
قال الشعاع للشمس يلا
نخلق بنور العزم همة
والله عليك يا مصري لما
تغزل ما بين الفرقة لمة
والفرحة ويا الشمس هلة
قال الشعاع للشمس يلا
النصرة ويا الفجر طاله
محلا الأمل في الصبر محلا
والفرحة ويا النصرة تحلا .
قال الشعاع للشمس يلا
ميلاد أمه(22)
جورج معاه عبد الرحمن
قرب لي يلا بسرعة كمان
يوم نصر مصر على العدوان
باركت لنا ملايكة رحمان
وجورج معاه عبد الرحمان
يوم الإيمان أصدرنا بيان
سبحنا مولى جرس وأدان
يومها اتولد فجر الشجعان
والقلب كان ع القلب كمان
جورج معاه عبد الرحمن
واليد واحدة وزادنا وحدة
يبقى لبهدف وحدة أوطان
جورج معاه عبد الرحمن
للفتنة قاهر والطغيان
قرب لي آخدك بالأحضان
راح نحترم كل الأديان
قوم بينا صلي على العندنان
من أوس خزرج أو نجران
شهدت جميعها إن الإسلام
دين ع السلام أمين وأمان
شهدت لنا آيات القرآن
أدخلوا مصر بكل أمان
ده جورج معاه عبد الرحمن
هدية غالية من الرحمن
قمر منور في الأوطان
ولا يقهرنا عدو جبان
ده جورج معاه عبد الرحمان
لما كنت صغيرة(23)
وردة جوا المندرة
قالوا عني
وشافوا إني
كنت حتة سكرة
لما كنت صغيرة
كان يمر العيد عليا
وضحكة رايحة وفرحة جاية
كان حنان أمي عليا
وردة بيضة مخضرة
لما كنت صغيرة
كان حنان لحظة فراقي
يروي حبي واشتياقي
للأراضي مخضرة
لما كنت صغيرة
والنجوم بتلالي فوق
كان جمال حسي يفوق
طرحة تلي مشجرة
لما كنت صغيرة
شفت مجدي ف عهد جدي
يتزرع ف احضانه ودي
والإله يفرح بحمدي
رغم إن الفقر عندي
أرض قلبي منورة
لما كنت صغيرة
لما كنت أتمنى أكبر
أروي أرض المسك عنبر
والخيوط م الشمس تكبر
نورها جوا الكون يكبر
يعلا صوت القاهرة
لما كنت صغيرة
مستحيل كان يوم أصدق
إن إيد للأرض تحرق
تخطف الأحلام وتسرق
أو مابينا ف يوم تفرق
لما كنت صغيرة
كنت بحلم زي طير
ينزرع فاحضانه خير
مش ألم يصبح أسير
نعش لو يصبح أمير
يبكي جوا القلب يسأل
فينها تاني المندرة
لما كنت صغيرة
سر انتصاري(24)
قالوا البطل ده ابنك
قالوا البطل ده ابني
قالوا البطل ده مسلم
قالوا البطل ده قبطي
قالوا البطل ده جاري
وأنا أعلنت اعتذاري
ابني وإبنك وجاري
هما سر انتصاري
وميلاد فجري ونهاري
قالوا البطل ده مسلم
أنا قلت الفرحة لمه
قالوا البطل دا قبطي
أنا قولت الدين ده رحمة
والوحدة بتبني أمة
هايهل النور علينا
محمد يا نبينا
يا هدية ورحمة لينا
يا ما قلت الاحترام
للدين واجب علينا
وأكيد في الشدة مسلم
يحضن بالحب قبطي
والجنة دي يعني رحمة ... وقلوب بالحب تعطي
رسالة أطفال الأقصى(25)
سكوت للجميع
وليا استماع
وليش الضياع
وقلبي اللي ضاع
في لحظة وداع
أبويا اللي جاع
وم الأقصى بصرخ
وباهتف سماع
وقلبي القنوع
ما بين الضلوع
صليل للسيوف
بيرجف يجوع
وم الخوف اسير
شوية رعاع
وليش الضياع
وعمي وأخويا
طوب الارض باع
سابوني بآسي
أسير الرعاع
ليش الضياع
وجوايا طير
يرفرف يطير
يحيي العروبة
ويزرعها خير
وم الأقصى باهتف
وباصرخ سماع
ودم العروبة
على الأرض ساح
في أيام كسينجر
وبوش لما دمر
وليفني تدبر
وتبني وتشكر
أمير الضياع
وليش الضياع
أوباما بخير
واخويا الصغير
في لحظة ميلاده
هجوم الرعاع
بيقتل في أمي
وتنزف يا دمعي
في لحظة وداع
لأمي الشهيدة
وابويا الي ضاع
وليش الضياع
وفرقة بتحرق
قلوب الجياع
لفتحي وحماسي
وسيف الضياع
بيسألني زيي !!!
ليه يد أخويا
بتقتل أبويا؟؟
ويفرح عدايا
يغذي الصراع
سكوت للجميع
وليا استماع
ليش الضياع
وهمي يا أمي
بيغزل في دمي
صراخك أنين
يبكي السنين
وفرقة وطننا
هوا المعتدين
ومستوطنين
تفرق صفوفنا
وتقتل ضيوفنا
وتغزل بخوفنا
كفونا ونعوشنا
سكوت للجميع
وليا استماع
يا فرقة بلادي
يا أصل الضياع
تضمي الأيادي
يهون اللي باع
وهاكبر يا أمي
وها بقى الشجاع
بروحي ودمي
وحقي اللي ضاع
راح أغزل يا أمي
خيوط الشعاع
وللفجر هاحلف
بحقي الي ضاع
ما تصبح يا أقصى
أسير الرعاع
سكوت للجميع
وليا استماع
وليش الضياع
وقلبي اللي ضاع
بيولد شعاع
ويأبى الضياع
إيماني في قلبي
مايفرد دراع
ولا أذرع في لحية
ولا ألبس قناع
بديني وسلوكي
هابدد شكوكي
وللعالم أثبت
بإني الشجاع
وأرجع لأبويا
مكانه اللي ضاع
سكوت للجميع
وليا استماع
يا أرض الشعاع
دا جوايا قلبي
بيرفض خضوع
ويولد شعاع
سكوت للجميع
وليا استماع
الجمعة أكتوبر 21, 2016 4:21 pm من طرف 
Ahlamontada 
