متغرب أين وطني

متغرب
رغم الفراق أنا قلبي ساكن عندها
يلا يا قلبي ....
يلا قوام نرجع لها
رفرف وبوس مابين عنيها وخدها
ارميني تاني ف حضنها
راح أبوس إيديها الله عليها
الله على رقة جمالها وحسنها
باعزف أنا ع الناي حروفها وإسمها
كل الحروف الغالية دايبة ف شعرها
دي الميم: - محبة وخير يدوم على أرضها
والص: - صبرنا لما عبرنا
وجيشنا رجع مجدها
والراء:- روايح جنة واديها
مصر الحبيبة الله عليها
عاشق أنا
لجمال سماها وأرضها
رغم الفراق أنا قلبي ساكن عندها
كنت ف ضياع وحس بيا قلبها
واحلف لكل الدنيا إني بحبها
وكل كنوز الدنيا فانية في ضفرها
مابين نخيل وأحضان شجر كان حضنها
يطلع يبوس خد القمر ويعود لها
واسماعيلية وبور سعيد بتقولها
رقص السلام حط الحمام جاب نصرها
فرح الهلال ويا الصليب بإبنها
لما اندفع بالدم يومها مهرها
بعد السلام لازم نخضر أرضها
شال الحمام حط الحمام ياسحرها
ولا أحلى صبية بكر ف ليلة عرسها
في عنيها كل الدنيا دايبة يا بختها
باس القمر خد النجوم وقالها
يا جمال الصبر في عشق مصر وإبنها
ده كل حرف من حروفها وإسمها
زارع جناين ورد هدية شعبها
غصن الزيتون حضن السلام على أرضها
رغم الفراق أنا قلبي ساكن عندها
يلا ياقلبي – يلا قوام نرجع لها
للميم والص والرة باست شمسها
باس النسيم في الصيف جبينها وشعرها
مهما يطول البعد أنا بارجع لها
رغم الفراق أنا قلبي ساكن عندها
يلا يا قلبي يلا قوام نرجع لها