محاسن بيومي في سرقة حنين

عدت سنين رغم الأنين
وف ثانية يسرقني الحنين
أعزف على الناي الحزين
صوت النجوم السهرانين
لحظة حنان العاشقين
والسيدة وسيدنا الحسين
وبهية لو تعشق ياسين
تتوضى بالضي الإيدين
فين أهل بلدي الطيبين
عدت سنين رغم الأنين
هوا الحنين هواه
ويا ألف آه وآه
ليه الصبر توهناه
وظلمنا روحنا معاه
جرح الوطن جواه
م الفرقة مليون آه
عاشق لأرضه تاه
خاين وأمناه
وأمين وخوناه
ارحمنا يا الله
والوحدة فين ومنين
عدت سنين رغم الأنين
ع الجيش أبو الشجعان
حامي حمى الأوطان
والجندي دا الإنسان!!
دمه روى الأغصان
وف لحظة العدوان
ع الأرض كان بركان
تمر السنين ورغم الأنين
رمال الصحارى بتولد حنين
وجندي فدائي على المعتدين
بيحلف بأرضه ومية وطين
وقصة كفاحنا ومينا وياسين
ما هنسيب سلاحنا ولو ميتين