أرشيف المشاعر

[
---------

أرواح شفافة
نجوم الليل بتتصافى
تميل ع القلب يتشافى
مابين أرواح بتتلاقى
لقا للروح منين ماطروح
سنابل للوفا والبوح
بتوصف لون جمال الروح
ملايكة وطاهرة مشتاقة
لبحر الخير بترمي هموم
وتخرج لئلاءة
ورب قلوب جمها يادوب
بكل الحب تتلاقى
لقا للروح أكيد مكتوب
لقا للروح منين ما طروح
تميل ع القلب يتشافى
وكل جروحه تتعافى
نجوم الليل بتتصافى

------------

بداية المشوار
حب وشجر نوار
وحبيب يناجي حبيب
بهمس قلبه تطيب
كل الجراح وتغيب
في بداية المشوار
تقول عيونه ياليل
ترقص نجوم الليل
تبقى الليالي انهار
يطول ليالي الشوق
بجناحه يعلا لفوق
في بداية المشوار
ياسلام لو الإنسان
يصبح كما الريحان
في الحر نسمة صيف
تمحي الألم والزيف
قلبه ف شتاه دفاه
والدنيا ماشية معاه
في بداية المشوار

-----------
ياسلام ع الحب
لو يتولد يوم حب
م الهم يصفى القلب
وكل طفل شريد
عمره ما يبقى وحيد
لو يتولد يوم حب
تطرح ليالي زهور
ويدق قلب النور
يطرح جنانين ورد
لو يتولد يوم حب
يرحم قوي لضعيف
ويرق قلب السيف
القلب يبقى نظيف
لو يتولد يوم حب
للخلق يبقى ضمير
رمز الإيمان والخير
دا المولى فضله كبير
لو يتولد يوم حب

--------------

اشتياق
يا حبيبي كان نفسي أشوفك
تلمس إيديا أنا بكفوفك
شفت القمر أنا في عيونك
يا حبيبي كان نفسي أشوفك
أشواقي تعزف لغرامي
وتروق وتحلالي أيامي
ساعة ما أشوفك قدامي
ع القلب كان مرسوم طيفك
يا حبيبي كان نفسي أشوفك
وسمايا بيك تباهي نجومها
تشوف عيونك في منامها
وانت جميل قوي قدامها
يا حبيبي كان نفسي أشوفك
وعيوني تصبح فرحانة
في جمال عيونك سهرتنة
يا حبيبي كان نفسي أشوفك

-----------------

خلاص
يا ما كنت اتمنى تسأل
وأنت تتقل وتتقل
يا خسارة على الهوا
لو ضاع معنى الحياة
إزاي الحب يوصل
وأنا كنت أتمنى تسأل
وأنت تتقل وتتقل
يا ما كان قلبي معاك
دايب حب في هواك
وفي فرحك وأساك
كان دايما قلبي يسأل
لكن خلصت خلاص
لازم هاوضع أساس
والجرح في الإحساس
يقول للحب يرحل
كان حبك لي الهلاك
وأنا قلبي راح ينساك
منايا في يوم لقاك
ما أسألشي ولا تسأل
ياما كنت أتمنى تسأل
وأنت تتقل وتتقل

--------------

بحر النسيان
ما بين يومي وبين أمسي
خيوط الفجر ناسياني
وبين ألمي وبين يأسي
بكأس المر ساقياني
أصالح في الهوى نفسي
وأقول يا صبر من تاني
تضيق بيا الليالي تطول
أقول راضي بحرماني
وترجع بالزمان على طول
سنين العمر من تاني
أدوبها في ألامي وأقول
في قلب جراحي جارحاني
ورب العرش قواني
مابين يومي وبين امسي
كرهت الغربة عن نفسي
لاقيتها في بحر نسياني
وبين ألمي وبين يأسي
خلاص ضيعت عنواني
------------------
دوامة
دوامة وناس عطشانة
للفرح يسكن دارنا
والخير يعم ديارنا
والبركة تبقى حدانا
والحب فينا أمانة
دوامة وناس عطشانة
ما في حد منا يخون
ربك كبير وحنون
ما هياش لامال وبنون
ولا فاضية ولا مليانة
دوامة وناس عطشانة
للجنة تبقى ديارنا
والصبر يبقى دوانا
والخير مصباح قلوبنا
الرب يبقى معانا
والرحمة تبقى طريقنا
تنقذنا من الدوامة
دوامة وناس عطشانة

-----------------

حور العين
عشقت الليل جمال قمره
يقول لي ياعين
في ليل الشوق يكون بدره
تشوفه اتنين
تحس ملامحه في روايحه
ما بين تايبين
عشقت الليل جمال قمره
بيقول لي ياعين
راح أدعي المولى
والواجب تقولوا آمين
يا رب اجمعنا بحبيبك
وحور العين
يكون لي نصيب في ترتيبك
ما بين تايبين
شرح لي القلب قرآنك
رسوله آمين

----------------

حبيبتي
ولاقيتني بعد السكون
تايه في موالك
وبهمس قلبي الحنون
كلمة وبقولهالك
في العشق أنا مجنون
والحب كله إنتي
حبيبتي يا حبيبتي
تتسابق طيور الكون
تلاقي دفاها أحضانك
وعمري يا حبيبة يهون
يهون الدم علشانك
وقلبي والله غصن زتون
وجنة دنيته إنتي
حبيبتي يا حبيبتي
عشتي في القلب عشتي
حبيبتي يا مصر إنتي

------------------

قلب السيف
يا عروبة قولي ليه
يقتلني أنا سيفك
قلب السيوف بيرق
واتحرضه اكفوفك
محتاج لثورة حق
تراضيني وأشوفك
يا أخويا عربي ليه
بإيديك يسيل دمي
يوصف نيران الويل
مع دمع طفل ذليل
يا عروبة قولي ليه
في الهم أنا عايش
والدبابات والنار
على دمي تتعايش
ياأخويا عربي ليه
يرقص معاه سيفك
والاحتلال إزاي
يصبح على كيفك
لا بتهدي طوق لسلام
ولا يوم رحم سيفك
خد إيدي مع إيدك
ناخد سوا بالتار
للأقصى والأنبار
من الظلم والأشرار
وأقول أنا عربي
بالدم أنا عربي
والمجد للأحرار

----------------
شعاع المصري
قال الشعاع للشمس يلا
أنوار جبين المصري هلة
والمصري ده سلطان زمانه
والكل عارف فين مكانه
الله عليه والحارس الله
قال الشعاع للشمس يلا
نخلق بنور العزم همة
والله عليك يا مصري لما
تغزل ما بين الفرقة لمة
والفرحة ويا الشمس هلة
قال الشعاع للشمس يلا
أرض العروبة دي وطننا
والصبر هايقويه إيماننا
مهما يقولوا أو يعيدوا
حضن العروبة مصريتنا
والفرحة ويا النصرة تحلا
قال الشعاع للشمس يلا

--------------

صوت الحب
يقول الدمع يا عيني
بصوت الحب ناديني
يرجعني من الغربة
يعوض صبري وأنيني
يقول الدمع يا عيني
غزلت بدمعي أحزاني
لتوب ألمي وحرماني
نداني القلب من تاني
قابلته في بحر نسياني
دمعوي ويا أشجاني
بتترجاني من غربة
يعود الحب من تاني
يقول للدمع يا عيني
بصوت الحب قويني
وداوي صبري وأنيني

-----------------

قلب الزمن
زمان كان ليا قلب
في الحب زيه ما فيش
دلوقتي أصبح ذنب
بالحب لو هايعيش
زمان كان ليا قلب
عاشق حنان وحنين
يغزل لي توب الصبر
ويغني للعاشقين
وهاروح له فين ومنين
الله عليك يا بدر
يوم لو تكون اتنين
وأنا أغني ويا الفجر
وأقول ياليلي ياعيني
زمان كان ليا قلب
-------------

ليه البعاد بيطول
عن بعدي مين مسئول
ليه البعاد بيطول
وأفضل أنا مشغول
قول يا حبيبي قول
وارجع لي تاني عشاني
مشتاق إليك بحناني
لسه معاك عنواني
قول يا حبيبي قول
الشمس هي جبينك
والحب هو حنينك
كل النجوم شايفينك
مهما الليالي تطول
قول ياحبيبي قول
عاشقك ومش معقول
كل الأماني اتزول
هافضل أغني أوقول
قول يا حبيبي قول
ليه البعاد بيطول
-----------------

فارس الترحال
موال وكام مرسال
وخطانا ع الأهوال
بسألها ألف سؤال
عن فارس الترحال
إزاي بسمار جبينه
وبياض قلبه وحنينه
كل العيون شايفينه
إنسان غريب رحال
طيبة قلبه وأنينه
وقلوب كتير ظالمينه
تايهين ومش عارفينه
دا الغدر منه محال
موال وكام مرسال
عن فارس الترحال
عاشق أنا الموال
يا فارس الترحال
زيك أنا رحال
والروح تناجي الروح
كل اللي شافك قال
دا صمته أحلى كلام
يتحدى بيه الأيام
وقلبه خير وسلام
رغم إن أناته
صوتها يهز جبال
في كلامه وسكاته
عالم اكيد فنان
وألف آه وآه
لو يوم يتوه مرساه
تلقاه في عز الآه
كل القلوب مرساه
والطيبة دي زاده
كرم الإله علاه

------------------

آه يا ليلي
آه يا ليلي وآه يا عين
ع الحب ما بين قلبين
لو يطرح شوق وحنين
آه يا ليلي آه يا قمر
حبك ده حكم القدر
يا حبيبي حبك أمر
في عيونك يحلا السهر
وآه يا ليلي آه يا عيني
يرويك حبي وحنيني
تسكن روحي وتكويني
آه يا ليلي آه يا قمر
أنا صحرا وانت المطر
أنا طير وانت الشجر
مش عارفة ليه أنا حيرانة
في عيون حبيبي وسهرانة
سهران هنا الحب معانا
آه يا ليلي آه يا زماني
قلبك وطني وعنواني
ناسية زماني ومكاني
طيرة ف أحضانها شجر
آه يا ليلي آه يا قمر
حبك ده حكم القدر

--------------------

عيون حبيبي

يا عيون حبيبي أنا سامحيني
مش قصدي أظهر بأنيني
سامحي الهوى والشوق والروح
يلا احضنيني أنا ضميني
يا عيون حبيبي أنا سامحيني
محتاج حنانك دفيني
قلبي اللي ياما قاسى الحرمان
غير مبادئي وتكويني
وصبحت عاشقة بكل إيمان
دستوري شوقي وحنيني
يا عيون حبيبي أنا سامحيني
حبيبي روحي ونور عيني
واللمسه من الهنا تحييني
من نظرة بس بترويني
ياعيون حبيبي أنا سامحيني
مابين ضلوعه أنا قلبي هناك
يقوله روحي أنا رهن رضاك
حيرانه م الباب للشباك
لو دق قلبي أنا هاستناك
وافتح وأدوب لحظتها معاك
مين صدره غيرك يئويني
ياعيون حبيبي أنا سامحيني
سامحي الهوا والشوق والروح
يلا احضنيني وضميني

---------------

جزيرة الحب
ريشة فنان رسمت إنسان
أحضانه أوطان وكلامه كمان
أبيات لقصايد لها أوزان
محلاه فنان حبيبي وإنسان
من حبي زرع ياسمين وريحان
الشوق وياه توهني وتاه
من قولة آه والقلب معاه
دوبني وداب في ليالي هواه
محلاه فنان حبيبي وإنسان
البحر بيشرب منه حنان
وسمايا كمان وقمر سهران
غيران حيران
لو انطق اسم حبيبي كمان
محلاه فنان حبيبي وإنسان
دي اللحظة في بعد حبيبي سنة
وأنا أقوله بحبك آه يا أنا
اغزل أنا اسم حبيبي هنا
محلاه فنان حبيبي وإنسان
بانسى وياه مين تبقى أنا
صوتك ألحان ونغم رنان
محلاك إنسان محلاها أوطان
جزيرة حب ف قلبي أنا
آه يانفسي بحبك
آه يا أنا

---------------

لحظة عجز
إزاي ياقلبي حبيبي
يصرخ يقول الآه
وأنت يا قلبي حبيبه
ساكن معاه وجواه
إزاي يقول الآه
وقلبي منه قريب
أجمل وأغلى حبيب
لحظة ما قال الآه
هربت دموع العين
أشكي لمين أو فين
واصرخ بأغلى الصوت
ليه الزمن بيفوت
ع الحب يصبح ذنب
تنزف دموع القلب
في زمن وله وشين
إزاي يقول الآه
والعين تناجي العين
كل القلوب حاضناه
وأنا قلبي فيه سكين
يا قلبي مليون آه
باصرخ وأقولها معاه
إزاي نعيش مساكين
مع إن نبض القلب
مقسوم بين الحبيبين

--------------------
قمر السهر سهران
محتار يا ناس حيران
يا صبر والله زمان
قمر السهر سهران
وأملنا جاي بكرة
مبسوط ياناس فرحان
يتزف بالبشرى
وأنا بالأمل أدرة
أرجع اللي كان
قمر السهر سهران
وطيوره تتوشوش
في القلب بتعشش
يا حبيبي ما هنتش
والله علي ثوان
قمر السهر سهران
في عشقي أنا ولهان
وحروفي تتمايل
قوافيها والأوزان
قمر السهر سهران
ونجومه زي زمان
تغزل حروف إسمك
أجمل حبيب إنسان
فارس بلا عنوان
للحب كان قبطان
فلبه بمليون سفينة
بحره محبه وحنان
قمر السهر سهران[/size]